Erkən Bəhai İcması

 

Həzrət Babın edamından dərhal sonrakı on il ərzində Həzrət Bəhaullah Bağdadda olanda babilərin arasında çox səmərəli bir liderliyi üzərinə götürdü, icmanı yenidən təşkil etdi və onlarda ruh yüksəkliyi yaratdı. Bundan əlavə, O, Bağdad sakinləri ilə, o cümlədən, dini liderlərlə ünsiyyət yaratdı.

 

Özünə yaxın olanlara Öz missiyasını Bağdaddan ayrılma ərəfəsində elan etsə də, Həzrət Bəhaullah məhz Ədirnədə olarkən açıq şəkildə bəyan etməyə başladı ki, O, Həzrət Babın vəd verdiyi Kəsdir. O, həmçinin, İrana nümayəndələr də göndərdi ki, Həzrət Babın oradakı ardıcıllarına Onun iddiası barədə məlumat versinlər. Çox az sayda adamdan başqa, babilərin hamısı Həzrət Bəhaullaha tərəf döndülər.

 

Onun göndərdiyi elçilər arasında Yəzddən Əhməd adlı sədaqətli bir ardıcılı vardı. 1865-ci ildə, Həzrət Bəhaullah Əhmədə bir Lövh göndərdi və orada Özünü keçmişin Müqəddəs Kitablarında xəbər verilən “Cənnət Bülbülü” və “Parlaq Camal” kimi təsvir etdi.

 

Bəhailərin İranda Təqibi

Yenicə yaranmış Bəhai icması İranda meydana çıxdıqca, tez-tez kəskin təqib və zülmə məruz qalırdı. Bu dövrdə öldürülən ən məşhur bəhailərdən biri Bədi kimi tanınan bir gənc idi. 1869-cu ildə, 17 yaşında ikən o, Əkkaya gələn və Həzrət Bəhaullahın hüzuruna müşərrəf olan ilk iranlı inananlardan biri idi. Həzrət Bəhaullah İran şahına ünvanladığı məktubu çatdırmağı Bədiyə etibar etmiş və göstəriş vermişdi ki, məktubu ünvanına çatdırmaq üçün tək İrana qayıtsın. Şah ovda olarkən məktubu cəsarətlə ona çatdıran Bədiyə işgəncə verdilər və qəddarcasına öldürdülər.